క్రిటికల్‌ ఇల్‌నెస్‌ బెనిఫిట్‌ పాలసీ

తీవ్ర అనారోగ్యం వచ్చినప్పుడు ఒకే మొత్తంలో బీమా హామీ మొత్తాన్ని చెల్లించి ఆర్థికంగా ఆదుకునే క్రిటికల్ ఇల్‌నెస్‌ పాలసీ వివరాలు తెలుసుకుందాం..

క్రిటికల్‌ ఇల్‌నెస్‌ బెనిఫిట్‌ పాలసీ

క్యాన్సర్‌, బైపాస్‌ సర్జరీ, అవయవ మార్పిడి, పక్షవాతం లాంటి తీవ్రమైన అనారోగ్యాలకు వైద్యఖర్చులు ఎక్కువగా అవుతాయి. ఇవి వ్యక్తికి తీవ్ర క్షోభను కలిగించడమే కాక కుటుంబ ఆర్థిక పరిస్థితిని ఛిన్నాభిన్నం చేస్తాయి. సాధారణ ఆరోగ్య బీమా పాలసీలున్నా కొంత మేరకు పరిమితి ఉంటుంది. ఇలాంటి ఇబ్బందులను అధిగమించేందుకు క్రిటికల్‌ ఇల్‌నెస్‌ పాలసీ ఉంటే పూర్తి భరోసా ఉంటుంది.

ఎప్పుడు ఉపయోగ పడుతుందంటే !!

సాధారణ ఆరోగ్య బీమా పాలసీలలో వైద్యానికి అయినా ఖర్చు మాత్రం చెల్లిస్తారు. అదే క్రిటికల్ ఇల్‌నెస్‌ పాలసీలు పాలసీ దారుడు ఒక సారి తీవ్ర వ్యాధికి గురయినట్టు తెలిపితే బీమా హామీ మొత్తాన్ని అందిస్తారు.

ఆరోగ్య బీమా పాలసీ ఉంది కదా మరి ఈ పాలసీ అవసరం ఏంటి అనుకోవచ్చు. సాధారణంగా ఒక సారి ఈ తీవ్ర వ్యాధులను ఉన్నట్టు గుర్తిస్తే అందుకు చికిత్స దీర్ఘ కాలం పాటు ఉంటుంది. పైగా ఖర్చుతో కూడుకుని ఉంటుంది. ఆరోగ్య బీమా పాలసీలు ఆసుపత్రి ఖర్చులు, ఇంటి వద్ద వైద్యం, ఇతర ప్రయాణ ఖర్చులు పరిమితుల ప్రకారం చెల్లిస్తాయి. కానీ క్రిటికల్‌ ఇల్‌నెస్‌ బెనిఫిట్‌ పాలసీలో వైద్యానికి అయ్యే ఖర్చు, చేయించుకునే సమయం, ఆసుపత్రి వంటి ఎలాంటి విషయాలను చూడకుండా వ్యాధి ఉన్నట్టు నిర్ధారించగానే హామీ మొత్తం చెల్లిస్తారు. ఈ మొత్తం కేవలం వైద్యానికే కాకుండా, చికిత్స అనంతరం, కోలుకునే సమయంలో ఇతర ఖర్చులు, కుటుంబ పోషణకూ ఉపయోగ పడుతుంది.

పాలసీ పొందడం

  • ఈ క్రిటికల్‌ ఇల్‌నెస్‌ జీవిత బీమా పాలసీతోపాటు రైడర్‌గా తీసుకునే వీలుంది లేదా ఆరోగ్య బీమా కంపెనీల నుంచి ప్రత్యేకంగా క్రిటికల్‌ ఇల్‌నెస్‌ పాలసీ తీసుకోవచ్చు.
  • జీవిత బీమాతో పాటు తీసుకునే రైడర్లు ఒకటి నుంచి పదేళ్ల వరకు బీమా హామీ ఇస్తాయి. అదే ఆరోగ్య బీమాతో తీసుకునే వాటికైతే 1నుంచి 5ఏళ్ల పాటు కవరేజీ ఇస్తారు.
  • క్రిటికల్‌ ఇల్‌నెస్‌ పాలసీ వ్యక్తిగతంగా లేదా కుటుంబ సభ్యులందరికీ కలిపి ఫ్యామిలీ ఫ్లోటర్‌గాను తీసుకోవచ్చు.
  • ఆరేళ్ల వారి నుంచి 75ఏళ్ల వ‌య‌సు ఉన్నవారికి ఈ పాలసీలు అందుబాటులో ఉన్నాయి.

బీమా రక్షణ

బీమా పాలసీలు ఎంపిక చేసిన కొన్ని వ్యాధులకు బీమా అందిస్తాయి. 10 నుంచి 20 వ్యాధులను కవర్‌ చేసే పాలసీలు మార్కెట్లో అందుబాటులో ఉన్నాయి.

  • ఈ పాలసీలు రూ.లక్ష నుంచి రూ.50లక్షల దాకా కవరేజీ ఇస్తాయి

మినహాయింపులు

  • పాలసీ తీసుకునే ముందు ఉన్న వ్యాధులకు (ప్రీ ఎగ్జిస్టింగ్‌ డిసీజెస్‌) ఈ పాలసీ వర్తించదు.

  • పాలసీ తీసుకున్న 90 రోజుల లోగా ఏదైనా వ్యాధి గుర్తించినట్టయితే దానికి బీమా కంపెనీలు ఎటువంటి బీమా చెల్లించవు. బీమా పరిభాషలో దీన్నే వెయిటింగ్‌ పీరియడ్‌ అని అంటారు.

సర్వైవల్‌ పీరియడ్‌:

  • వ్యాధి గుర్తించిన తర్వాత 30 రోజుల్లోపు మృతి చెందితే బీమా వర్తించదు.

  • కొన్ని రకాల తీవ్ర అనార్యోగాలకు పాలసీ చెల్లించే సొమ్ముకు పరిమితులు ఉంటాయి. దీన్నే ఉపపరిమితి (సబ్‌ లిమిట్‌) అంటారు. తీసుకునే పాలసీని బట్టి ఇది మారుతుంది.

క్రిటికల్‌ ఇల్‌నెస్‌ పాలసీ తీసుకునేటప్పుడు గమనించాల్సిన విషయాలు:

  • ఈ పాలసీని ఆరోగ్య బీమాకు ప్రత్యామ్నాయంగా చూడకూడదు. సాధారణ ఆరోగ్య బీమా అన్ని ఆరోగ్య సమస్యలను పరిగణనలోకి తీసుకుంటుంది. అదే క్రిటికల్‌ పాలసీ అయితే కేవలం తీవ్ర అనారోగ్యాలకు మాత్రమే వర్తిస్తుంది. అందుకే దీన్ని అదనపు భరోసానిచ్చే పాలసీగానే చూడాలి.

  • పాలసీదారుడు క్రిటికల్‌ ఇల్‌నెస్‌ పాలసీ తీసుకునేటప్పుడే తన ఆరోగ్య చరిత్ర, అలవాట్లు, ముందుగా గుర్తించగలిగే అవకాశమున్న వ్యాధులను బట్టి సరైన పాలసీ ఎంచుకుంటే ఉపయోగకరం.

  • ఏయే వ్యాధులకు ఉపపరిమితులు ఎంత మేరకు ఉన్నాయో గమనించి పాలసీని ఎంచుకోవడం మేలు.

  • ఎక్కువ వయసు వరకు పునరుద్ధరించుకునే వీలున్న పాలసీ ఎంచుకోవటం మంచిది.

  • ఆదాయపు పన్ను చట్టం ప్రకారం సెక్షన్‌ 80(డి) ప్రకారం పన్ను మినహాయింపు ఉంటుంది.

Comments

0

Post Comment

Thank you for submitting your comment. We will review it, and make it public shortly