కాంటాక్ట్ లెస్ కార్డులను ఉపయోగించడం ప్రమాదమా?

ఈ కార్డులను ఉపయోగించడం వలన మీరు లావాదేవీ చేసే ప్రతిసారి కార్డును స్వైప్ చేయాల్సిన అవసరం ఉండదు

కాంటాక్ట్ లెస్ కార్డులను ఉపయోగించడం ప్రమాదమా?

ప్రస్తుతం మీరు వినియోగిస్తున్న క్రెడిట్ లేదా డెబిట్ కార్డు గడువు తేదీ ముగిసినట్లైతే, బ్యాంకు అధికారులు మీకు కొత్త కార్డును అందిస్తారు. ఆ కార్డుపై చిన్న వైఫై సింబల్ ఉన్నట్లైతే, దానిని కాంటాక్ట్ లెస్ క్రెడిట్ / డెబిట్ కార్డు అంటారు. ఈ కార్డులను ఉపయోగించడం వలన మీరు లావాదేవీ చేసే ప్రతిసారి కార్డును స్వైప్ చేయాల్సిన అవసరం ఉండదు. ఉదాహరణకు రమేష్ అనే వ్యక్తి కిరాణా వస్తువులను కొనుగోలు చేయడానికి దగ్గరలోని ఒక షాప్ కి వెళ్ళాడు. అతను తనకు కావాల్సిన వస్తువులను తీసుకున్న తరువాత, షాపు యజమానికి తన క్రెడిట్ కార్డును ఇచ్చాడు. అయితే, అతను కార్డు పిన్ నెంబర్ ను నమోదు చేయడానికి వేచిచూస్తుంటే, షాప్ యజమాని మాత్రం చెల్లింపు పూర్తయిందని కార్డును తిరిగి రమేష్ కు ఇచ్చాడు. అప్పుడు రమేష్ కి అనుమానం వచ్చి పీఓఎస్ మెషిన్ లో కార్డును స్వైప్ గాని, చిప్ ను ఇన్సర్ట్ గానీ చేయకుండా ఎలా చెల్లింపు పూర్తయిందని షాప్ యజమానిని అడిగాడు. దానికి అతను సమాధానం ఇస్తూ, ఇది వైఫై ఆధారంగా పని చేసే క్రెడిట్ కార్డు అని తెలిపాడు. అప్పుడు రమేష్ కి ఈ కార్డులు ఎంత వరకు సురక్షితమనే అనుమానం వచ్చింది. కాంటాక్ట్ లెస్ కార్డును ఉపయోగించి రూ. 2000 కంటే తక్కువ మొత్తం కలిగిన లావాదేవీని త్వరగా పూర్తి చేయవచ్చు. ఈ పరిమితిని రిజర్వు బ్యాంకు ఆఫ్ ఇండియా నిర్ణయించింది. ఈ పరిమితి అనేది అన్ని బ్యాంకులు జారీ చేసే కార్డులకు వర్తిస్తుంది. టెర్మినల్ నుంచి రేడియో ఫ్రీక్వెన్సీ ని గుర్తించడానికి చిప్, యాంటీనాలను ఈ కార్డులు కలిగి ఉంటాయి. ఒక వినియోగదారుడు తన కార్డును కాంటాక్ట్ లెస్ కలిగిన టెర్మినల్ పై (కార్డు రీడర్ కు నాలుగు సెంటీమీటర్ల లోపల) ఉంచినప్పుడు, ఎన్క్రిప్టెడ్ కార్డు, పిన్ వివరాలు కార్డు నుంచి వైర్ లెస్ ద్వారా టెర్మినల్ కు బదిలీ అయ్యి చెల్లింపు ప్రక్రియ పూర్తి అవుతుంది.

‘నియర్ ఫీల్డ్ కమ్యూనికేషన్’ అని పిలిచే టెక్నాలజీ కలిగిన మెషిన్స్ లో మాత్రమే ఈ కార్డులు పనిచేస్తాయి. కేవలం కార్డును మెషిన్ పై ఉంచడం ద్వారా సులభంగా చెల్లింపు చేయవచ్చు. ఒకవేళ లావాదేవీ మొత్తం రూ. 2,000 కంటే ఎక్కువ ఉన్నట్లయితే, అప్పుడు మీరు ఈ కార్డులను సాధారణ డెబిట్ లేదా క్రెడిట్ కార్డుల మాదిరిగా ఉపయోగించాల్సి ఉంటుంది.

సాధారణంగా ఈ కార్డులు సీనియర్ సిటిజన్స్ కు ఎంతగానో ఉపయోగపడతాయి. ఎందుకంటే వారు ఏదైనా చెల్లింపు చేసే సమయంలో తమ కార్డు పిన్ నెంబర్ ను తరచుగా మర్చిపోయే అవకాశం ఎక్కువగా ఉంటుంది. అలాగే త్వరితగతిన చెల్లింపులు చేయాలనుకునే వారికి కూడా ఈ కార్డులు ఎంతగానో ఉపయోగకరంగా ఉంటాయి.

దొంగతనం విషయంలో జాగ్రత్త వహించండి :

ఒకవేళ మీ కాంటాక్ట్ లెస్ క్రెడిట్ కార్డులు దొంగతనానికి గురైనట్లైతే, మీ డబ్బు సులభంగా దొంగతనానికి గురయ్యే అవకాశం ఎక్కువగా ఉంటుంది. దానికి కారణం మీరు ఎలాంటి పిన్ నెంబర్ నమోదు చేయకుండానే, లావాదేవీనీ పూర్తి చేయవచ్చు. అయితే, ఈ కార్డు ద్వారా రూ. 2000 కంటే ఎక్కువ మొత్తం కలిగిన లావాదేవీని పూర్తి చేయలేరు.

మీ కార్డు ద్వారా రోజుకి కేవలం ఐదు కాంటాక్ట్ లెస్ లావాదేవీలను మాత్రమే చేయగలరు. అనగా ఎలాంటి పిన్ నెంబర్ ను నమోదు చేయాల్సిన అవసరం లేకుండా మీ కార్డు రోజుకి రూ. 2000 కంటే తక్కువ మొత్తం కలిగిన ఐదు కాంటాక్ట్ లెస్ లావాదేవీలను మాత్రమే అనుమతిస్తుంది. ఒకవేళ ఐదు కంటే ఎక్కువ లావాదేవీలు చేయాల్సి వస్తే, అప్పుడు కచ్చితంగా పిన్ నెంబర్ ను నమోదు చేయాల్సి ఉంటుంది. కావున మీ కార్డు దొంగతనానికి గురైనప్పటికీ, నష్టమనేది పరిమితంగా ఉంటుంది.

ఈ కార్డులకు బీమా కూడా వర్తిస్తుంది. ఒకవేళ ఈ కార్డులపై ఏదైనా మోసపూరిత లావాదేవీ జరిగినట్లయితే, 100 శాతం వరకు బీమా లభిస్తుంది. మీ కార్డుకు సంబంధించి ఏదైనా మోసపూరిత లావాదేవీ జరిగినా లేదా మీ కార్డు పోయినా వెంటనే బ్యాంకును సంప్రదించి, కార్డును బ్లాక్ చేయండి. అనంతరం మీరు పోలీసులకు ఫిర్యాదు చేసి, ఫస్ట్ ఇన్ఫర్మేషన్ రిపోర్ట్ (ఎఫ్ఐఆర్) కాపీని తీసుకోండి.

కార్డు వివరాలు, ఖాతా సంఖ్య, కార్డు పోయిన తేదీ, ఎఫ్ఐఆర్ కాపీ వంటి వివరాలను మీ రిజిస్టర్డ్ ఈ-మెయిల్ ఐడీ నుంచి బ్యాంకుకు పంపించాల్సి ఉంటుంది. బ్యాంకు నిర్దేశించిన సమయంలోగా మీరు పైన తెలిపిన వివరాలను బ్యాంకుకు పంపించాల్సి ఉంటుంది.

కాంటాక్ట్ లెస్ క్రెడిట్ కార్డులపై రిజర్వు బ్యాంకు అఫ్ ఇండియా పరిమితిని నిర్ణయించినందున, వినియోగదారులు లావాదేవీ పరిమితిని రూ. 2,000 కన్నా తగ్గించలేరు. బ్యాంకులు కూడా కాంటాక్ట్ లెస్ ఫీచర్ను నిలిపి వేయలేవు. ప్రస్తుత క్రెడిట్ కార్డు కాలపరిమితి ముగిసిన తర్వాత లేదా కొత్తగా క్రెడిట్ కార్డు కోసం దరఖాస్తు చేసుకున్నప్పుడు మాత్రమే బ్యాంకులు కాంటాక్ట్ లెస్ క్రెడిట్ కార్డులను వినియోగదారులకు అందిస్తున్నాయి. అందువలన, కాంటాక్ట్ లెస్ క్రెడిట్ కార్డులను వినియోగించే వారి సంఖ్య రోజు రోజుకి పెరుగుతుంది.

కాంటాక్ట్ లెస్ క్రెడిట్ కార్డును వినియోగించేటప్పుడు అజాగ్రత్తగా ఉండకండి. ప్రతి నెలా మీ క్రెడిట్ కార్డు స్టేట్మెంట్ ను క్షుణ్ణంగా పరిశీలించండి. ఒకవేళ మీ కార్డుపై ఏవైనా మోసపూరిత లావాదేవీలు జరిగినట్లు మీరు గుర్తించినట్లయితే, వెంటనే మీ బ్యాంకును సంప్రదించండి. ఒకవేళ మీ వద్ద ఎక్కువ క్రెడిట్ కార్డులు ఉన్నట్లయితే, వినియోగించని కార్డులను రద్దు చేయడం మంచిది.

Comments

0

Post Comment

Thank you for submitting your comment. We will review it, and make it public shortly