మ్యూచువల్ ఫండ్స్ vs యులిప్స్

యులిప్స్‌ కోసం చెల్లించే ప్రీమియంను కొంత మొత్తం బీమా కోసం, మరి కొంత సొమ్ము ఛార్జీలను మినహాయించుకొని మిగతా సొమ్మును మ్యూచువల్‌ ఫండ్ల యూనిట్ల పెట్టుబడులకు వినియోగిస్తారు.

మ్యూచువల్  ఫండ్స్ vs యులిప్స్

యూనిట్‌ ఆధారిత బీమా పాలసీలు (యులిప్స్‌), మ్యూచువల్ ఫండు (ఎంఎఫ్ ) యూనిట్ల మధ్య పోలికలు ఎక్కువగా కనిపిస్తాయి. యులిప్స్ అనేక విషయాల్లో మ్యూచువల్ ఫండ్ మాదిరిగా అనిపిస్తాయి. అయితే, వ్యక్తిగత ఆర్థిక ప్రణాళిక విషయంలో మాత్రం యులిప్, మ్యూచువల్ ఫండుల మధ్య మీరు తెలుసుకోవలసిన కొన్ని ముఖ్యమైన వ్యత్యాసాలు ఉన్నాయి. ఇది మీ ఎంపికకు సహాయపడుతుంది.

మొదటగా యూనిట్ లింక్డ్ బీమా పధకం (యూలిప్), మ్యూచువ‌ల్ ఫండ్ అంటే ఏమిటో తెలుసుకుందాం.

యూనిట్ లింక్డ్ బీమా పధకం (యులిప్):

జీవిత బీమాతో పాటు పెట్టుబడుల‌ను క‌లిపి ఉండే దాన్ని యూనిట్ లింక్డ్ బీమా పధకం (యులిప్) అంటారు. యులిప్స్ కోసం చెల్లించే ప్రీమియంను కొంత మొత్తాన్ని బీమాకు, మిగిలిన మొత్తాన్ని మ్యూచువల్‌ ఫండ్ యూనిట్లలో పెట్టుబడి పెట్టేందుకు వినియోగిస్తారు.

మ్యూచువ‌ల్ ఫండ్:

పెట్టుబడిదారుల నుంచి స‌మీక‌రించిన నిధుల‌ను వివిధ పెట్టుబ‌డి సాధ‌నాల్లో పెట్టుబడిగా పెట్టి రాబ‌డి పొందే వాటిని మ్యూచువ‌ల్ ఫండ్లు అంటారు. ఇవి సంపూర్ణంగా పెట్టుబ‌డిని ఉద్దేశించిన‌వి.

యులిప్, మ్యూచువల్‌ ఫండ్ ల మధ్య వ్యత్యాసాలు:

యులిప్ లు పెట్టుబడి, బీమా రెండిటిని అందిస్తాయి. ఒకవేళ మీరు సంప్రదాయ బద్దంగా పెట్టుబడి పెట్టాలని భావించినట్లైతే, మీరు రుణం కోసం వీటిని ఎంచుకోవచ్చు లేదా ఈక్విటీని ఎంచుకోవచ్చు. అలాగే మీరు ఈక్విటీ వృద్ధి, రుణ స్థిరత్వాన్ని పొందడానికి రెండిటినీ ఎంచుకునే అవకాశం ఉంది. అంతేకాకుండా, యులిప్ లు జీవిత బీమాను కూడా అందిస్తాయి. ఇది పెట్టుబడి ఆఫర్ల పెరుగుదలతో పాటు ఒక ఇన్ బిల్ట్ టర్మ్ బీమాను కూడా అందిస్తుంది. మరోవైపు, మ్యూచువల్ ఫండ్లు జీవిత బీమాను అందించవు. ఇవి అచ్చంగా పెట్టుబడి ఉత్పత్తులు మాత్రమే. యులిప్ ప‌థ‌కాల్లో పెట్టుబడిదారులు చెల్లించే ప్రీమియంలో కొంత భాగం బీమా ప్రీమియం చెల్లింపుకు కేటాయిస్తారు. కాబ‌ట్టి పెట్టుబడిదారుడు చెల్లించే మొత్తం ప్రీమియం పెట్టుబడుల్లోకి వెళ్ల‌దు. మ్యూచువ‌ల్ ఫండ్ల‌లో బీమా ఉండ‌దు కావున మొత్తం పెట్టుబ‌డిల్లోకి వెళ్తుంది. దీంతో రాబ‌డి కూడా యులిప్ కంటే మ్యూచువ‌ల్ ఫండ్ల‌లో ఎక్కువ‌గానే వ‌స్తుంది.

10 శాతం ప‌న్ను విధించినప్పటికీ యులిప్ల కంటే మ్యూచువ‌ల్ ఫండ్లు ఆక‌ర్ష‌ణీయమైన రాబడులను అందిస్తాయి. యులిప్ ప‌థ‌కాల్లో ప్రీమియం అలోకేష‌న్ ఛార్జీలు, మోర్టాలిటీ ఛార్జీలు, ఫండ్ నిర్వ‌హ‌ణ ఛార్జీలు, పాల‌సీ నిర్వ‌హ‌ణ ఛార్జీలు, స‌రెండ‌ర్ ఛార్జీలు, ఫండ్ స్విచ్ఛింగ్ ఛార్జీలు ఉంటాయి. కానీ మ్యూచువ‌ల్ ఫండ్ల‌లో కేవలం ఫండ్ నిర్వహ‌ణ ఛార్జీలు మాత్ర‌మే ఉంటాయి. అయితే వీటిలో ఎక్జిట్ లోడ్ ఉంటుంది. ఒకవేళ నిర్ణీత కాలం కంటే ముందుగా ఉప‌సంహ‌రించినట్లైతే ఈ ఛార్జీలు ఉంటాయి.

లిక్విడిటీ ప‌రంగా చూస్తే యులిప్ ల కంటే మ్యూచువ‌ల్ ఫండ్లు ఎక్కువ లిక్విడిటీని కలిగి ఉంటాయి. ఓపెన్ ఎండెడ్ మ్యూచువ‌ల్ ఫండ్ల‌లో ఎప్పుడైనా యూనిట్ల‌ను విక్ర‌యించి నిధులను పొందే అవకాశం ఉంటుంది. కానీ క్లోజ్ ఎండెడ్ ఫండ్ల‌కు కొంత కాల‌ప‌రిమితి ఉంటుంది. అయితే వీటిని ఎక్స్ఛేంజీ ద్వారా నేరుగా విక్ర‌యించ‌వ‌చ్చు. యులిప్ల‌కు ప్ర‌స్తుతం 5 సంవత్సరాల లాక్ ఇన్ పీరియ‌డ్ ఉంది.

ప్ర‌స్తుత ప‌న్నువిధానం ఈక్విటీ మ్యూచువ‌ల్ ఫండ్ల‌లో దీర్ఘ‌కాలానికి ఏడాది పైన వ‌చ్చే రాబ‌డికి 10 శాతం ప‌న్ను ఉంది. యులిప్ ప‌థ‌కాల్లో ఆదాయ పన్ను చట్టం, సెక్ష‌న్ 80సీ కింద ప‌న్ను మిన‌హాయింపు ఉంటుంది. ప‌న్ను మిన‌హాయింపు కోస‌మే అయితే దీని కంటే కూడా ఈఎల్ఎస్ఎస్ లో పెట్టుబ‌డి చేయ‌డం మంచిది. ఈఎల్ఎస్ఎస్ ప‌థ‌కాలు యూలిప్ ల కంటే మంచి రాబడులను ఇస్తాయి. వీటికి 3 సంవత్సరాల లాక్ ఇన్ పీరియడ్ ఉంటుంది. దీనిలో కూడా బీమా ఉండ‌దు. కాబట్టి ఛార్జీలు మిన‌హా మిగిలిన మొత్తం పెట్టుబ‌డి అవుతుంది.

Comments

0

Post Comment

Thank you for submitting your comment. We will review it, and make it public shortly