చట్టం అందించే మెటర్నిటీ ప్రయోజనాలు..

ఎంప్లాయిస్ స్టేట్ ఇన్సూరెన్స్ యాక్ట్, 1948 ప్రకారం, 10 లేదా అంతకంటే ఎక్కువ మంది పని చేసే సంస్థలలో మహిళలకు మెటర్నిటీ ప్రయోజనాలను అందించాలి

చట్టం అందించే మెటర్నిటీ ప్రయోజనాలు..

గర్భధారణ సమయంలో, ప్రసవం తర్వాత మహిళా ఉద్యోగుల హక్కులను కాపాడేందుకు అన్ని సంస్థలు మహిళా ఉద్యోగులకు మెటర్నిటీ ప్రయోజనాలను అందించడాన్ని భారతీయ చట్టం తప్పనిసరి చేసింది. భారతదేశంలో మెటర్నిటీ ప్రయోజనాన్ని ప్రధానంగా మెటర్నిటీ బెనిఫిట్ యాక్ట్, 1961 నిర్వహిస్తుంది, ఇది 10 లేదా అంతకంటే ఎక్కువ ఉద్యోగులు ఉన్న అన్ని సంస్థలకు వర్తిస్తుంది. ఎంప్లాయిస్ స్టేట్ ఇన్సూరెన్స్ యాక్ట్, 1948 ప్రకారం, 10 లేదా అంతకంటే ఎక్కువ మంది పని చేసే సంస్థలలో మహిళలకు మెటర్నిటీ ప్రయోజనాలను అందించాలి.

మహిళా ఉద్యోగులు ఉద్యోగంలో చేరే సమయంలో వారికి లభించే మెటర్నిటీ ప్రయోజనాల గురించి రాత పూర్వకంగా, ఈ-మెయిల్ రూపంలో సంస్థలు తెలియచేయాల్సి ఉంటుందనే విషయాన్ని గుర్తించుకోవాలి. గర్భధారణ సమయంలో లేదా డెలివరీ తరువాత మహిళలు ఎక్కువగా విశ్రాంతి తీసుకోవాలని భావిస్తుంటారు, అలాంటి సందర్భంలో వారికి చట్టం అందించే హక్కుల గురించి తెలుసుకోవడం చాలా ముఖ్యం.

వేతనాలు, సెలవలు :

మెటర్నిటీ బెనిఫిట్ చట్టం ప్రకారం, సంస్థ వారి మహిళా ఉద్యోగులకి ఆరు నెలల జీతంతో కూడిన సెలవులను ఇవ్వాల్సి ఉంటుంది. అయితే, వారు మెటర్నిటీ ప్రయోజనాన్ని పొందడానికి సదరు సంస్థలో డెలివరీ తేదీకి ముందు 12 నెలల్లో కనీసం 80 రోజుల పాటు పని చేయాల్సి ఉంటుంది.

నిజానికి మొదట్లో మెటర్నిటీ బెనిఫిట్ యాక్ట్ కేవలం 12 వారాల మెటర్నిటీ ప్రయోజనాలను మాత్రమే అందించేది, వీటిలో డెలివరీకి ఆరు వారాల ముందు మాత్రమే సెలవు తీసుకోవాల్సి ఉండేది. అయితే, 2017 సంవత్సరంలో ఈ కాలపరిమితిని 26 వారాలకు పొడిగిస్తూ చట్టం చేయడం జరిగింది. ఈ 26 వారాలలో డెలివరీకి ఎనిమిది వారాల ముందు నుంచి సెలవు తీసుకునే అవకాశం ఉంటుంది. అయితే, మీరు కావాలంటే మొత్తం 26 వారాల సెలవులను డెలివరీ తర్వాత కూడా తీసుకోవచ్చు.

ఒకవేళ మహిళకు ఇద్దరి కంటే ఎక్కువ మంది పిల్లలు ఉన్నట్లయితే, అలాంటి సందర్భంలో మెటర్నిటీ ప్రయోజనం కేవలం 12 వారాలు మాత్రమే లభిస్తుంది. డెలివరీ అయిన తేదీ నుంచి 12 వారాల సెలవును పొందవచ్చునని చట్టం తెలియచేస్తుంది.

ఒకవేళ మహిళా ఉద్యోగి కుటుంబ నియంత్రణ ఆపరేషన్ చేయించుకున్నట్లైతే, ఆపరేషన్ తరువాత నుంచి రెండు వారాల పాటు జీతంతో కూడిన సెలవులను తీసుకోవచ్చు. అదే ఒకవేళ మహిళా ఉద్యోగికి గర్భస్రావం అయినట్లయితే, ఆపరేషన్ తరువాత ఆరు వారాల పాటు జీతంతో కూడిన సెలవులను తీసుకునే విధంగా చట్టం అనుమతిస్తుంది.

ఇతర ప్రయోజనాలు :

సంస్థలు తమ మహిళా ఉద్యోగులకు మెటర్నిటీ ప్రయోజనం కింద అదనంగా ఇంటి వద్ద నుంచే పని చేసే అవకాశాన్ని కూడా కల్పించవచ్చునని చట్టం తెలియచేస్తుంది.

బిడ్డకి 15 నెలల వయస్సు వచ్చే వరకు తల్లి రోజుకి నాలుగు సార్లు బేబీ కేర్ సెంటర్ కి వెళ్లి, బిడ్డ ఆలనాపాలన చూసే అవకాశాన్ని మెటర్నిటీ చట్టం కల్పించింది. అలాగే రోజుకి రెండు నర్సింగ్ విరామాలు తీసుకునే అవకాశాన్ని కూడా చట్టం కల్పించింది.

మహిళా ఉద్యోగి హక్కులు :

మెటర్నిటీ సెలవలు తీసుకున్నందుకు గాను మహిళా ఉద్యోగిని విధుల నుంచి తప్పించడం గానీ, టెర్మినేషన్ నోటీసును జారీ చేయడం గానీ సంస్థ చేయకూడదు. అలాగే, మెటర్నిటీ సెలవు సమయంలో మహిళా ఉద్యోగిని ఇబ్బందులకు గురిచేసే విధంగా యజమాని ఎలాంటి సర్వీస్ నిబంధనలను మార్చడానికి వీల్లేదు.

సిరి లో ఇంకా:
మ‌దుప‌ర్ల ప్ర‌శ్న‌ల‌కు సిరి జవాబులు , వ‌డ్డీ లెక్కేసేందుకు సిరి క్యాలుక్యులేట‌ర్ చక్ర వడ్డీ , ఏ అంశాన్నైనా సులభంగా అర్థ‌మ‌య్యేలా చేసే ఇన్ఫోగ్రాఫిక్స్, వివిధ ర‌కాల మ్యూచువ‌ల్ ఫండ్ల ప‌నితీరు ఎలా ఉందో తెలిపే ఫండ్ల వివ‌రాలు. ఫాలో అవ్వాలంటే ఈనాడు సిరి ఫేస్ బుక్ , ఈనాడు సిరి ట్విట్ట‌ర్

Comments

0

Post Comment

Thank you for submitting your comment. We will review it, and make it public shortly