ఏ ర‌క‌మైన‌ ఫండ్ల‌లో మ‌దుపుచేయాలి?

ఈటీఎఫ్ ల్లో నిర్వ‌హ‌ణ రుసుము త‌క్కువగా ఉంటుంది. ఇవి సూచీల‌ను అనుక‌రిస్తూ పెట్టుబ‌డులు చేస్తుంటాయి.

ఏ ర‌క‌మైన‌ ఫండ్ల‌లో మ‌దుపుచేయాలి?

ఈక్విటీ పెట్టుబ‌డుల‌కు సంబంధించి ప్రాథ‌మిక అవ‌గాహ‌న మ‌దుప‌ర్లు క‌లిగి ఉండాలి. మ్యూచువ‌ల్ ఫండ్ల‌లో నిర్ణీత కాలంపాటు కొన‌సాగించాల్సిన పెట్టుబ‌డులు, పెట్టుబ‌డి ఎప్పుడైనా ఉప‌సంహ‌రించుకునే అవ‌కాశం ఉండే పెట్టుబ‌డులు ఉంటాయి. కాబ‌ట్టి మ‌దుప‌ర్లు త‌మ ఆర్థిక ల‌క్ష్యాల‌కు అనుగుణంగా ఫండ్ల‌ను ఎంపిక చేసుకోవాలి. మ్యూచువ‌ల్ ఫండ్ల‌కు సంబంధించి మూడు ర‌కాల ప‌థ‌కాల గురించి ఇప్పుడు తెలుసుకుందాం. ఓపెన్ ఎండెడ్ ఫండ్లు: ఓపెన్ ఎండెడ్ స్కీము ఫండ్ యూనిట్ల‌ను ఎప్పుడైనా కొనుగోలు లేదా అమ్మ‌కాలు చేసేందుకు వీలుగా ఉంటుంది. మ‌దుప‌ర్లు ఎప్పుడైనా ఆరోజు ఎన్ఏవీ ధ‌ర‌కు కొనొచ్చులేదా అమ్మోచ్చు. ఈ ఫండ్ కి నిర్ణీత కాల‌ప‌రిమితి ఉండ‌దు. ఓపెన్ ఎండెడ్ ఫండ్ల లో పెట్టుబ‌డి చేసేందుకు మ‌దుప‌ర్లు మార్కెట్ స‌మ‌యంలో ఎప్పుడైనా చేయ‌వ‌చ్చు. దీనికి ఆన్ లైన్ లేదా ఆఫ్ లైన్ విధానాన్ని ఎంచుకోవ‌చ్చు.

క్లోజ్డ్ ఎండెడ్ ఫండ్లు:

ఇవి నిర్ణీత కాల‌ప‌రిమితిని క‌లిగి ఉంటాయి. ఉదాహార‌ణ‌కు 6 ఏళ్లు కాల వ్య‌వ‌ధి క‌ల్గిన  క్లోజ్డ్ ఎండెడ్ మ్యూచువ‌ల్ ఫండ్ ఆరేళ్ల వ‌ర‌కూ కొన‌సాగుతాయి. అనంత‌రం మ‌దుప‌ర్ల‌కు వారికున్న యూనిట్ల ప్ర‌కారం నిధులు చెల్లిస్తారు. ఫండ్ ఆఫ‌ర్ స‌మ‌యంలో ఈ యూనిట్లు కొనుగోలు చేయాలి. ఈ గ‌డువు మ‌ధ్య‌లో యూనిట్ల విక్ర‌యం చేయాల‌నుకునేవారు ఎక్స్చేంజీ ద్వారా చేయాలి. కొన్ని ఫండ్ల‌ నిర్వాహ‌కులు మదుప‌ర్ల నుంచి నిర్ణీత స‌మ‌యాల్లో ఎన్ఏవీ ప్ర‌కారం కొనుగోలు చేస్తారు. సెబీ నిబంధ‌న‌ల ప్ర‌కారం మ‌దుప‌ర్ల పెట్టుబ‌డి ఉప‌సంహార‌ణ‌కు ఎక్చ్చేంజీ లేదా ఫండ్ నిర్వాహకులు తిరిగి కొనుగోలు ఏదో ఒక‌టి అందుబాటులో ఉండాలి.

ఈటీఎఫ్‌లు:

మ‌దుప‌ర్ల నుంచి స‌మీక‌రించిన నిధుల‌ను ఏదైనా సూచీని అనుక‌రిస్తూ పెట్టుబ‌డి చేసే ఫండ్ల‌ను ఎక్స్ఛేంజ్ ట్రేడెడ్ ఫండ్లు (ఈటీఎఫ్‌) లు అంటారు. నిఫ్టీ-50, సెన్సెక్స్-30 లాంటి మార్కెట్ సూచీల‌తో పాటు బ్యాంకింగ్ నిఫ్టీ, ఆటో నిఫ్టీ , బీఎస్ఈ మిడ్‌క్యాప్ లాంటి ప్ర‌త్యేక రంగానికి చెందిన‌ సూచీల‌లో కూడా మ‌దుపు చేస్తుంటాయి. సాధార‌ణంగా స‌ద‌రు సూచీ ఏయే రంగాల‌కు చెందినవైతే వాటి పేరును ఈటీఎఫ్ పేరులో క‌లిపి పెడుతుంటారు. ఉదాహ‌ర‌ణ‌కు నిఫ్టీ బ్యాంకింగ్ ఈటీఎఫ్, బ్యాంకింగ్ సూచీని అనుక‌రిస్తూ పెట్టుబ‌డి చేస్తుంది. కాబ‌ట్టి వ్య‌వ‌హారికంగా దీన్ని బ్యాంకింగ్ ఈటీఎఫ్ అంటారు. మ్యూచువ‌ల్ ఫండ్లతో పోలిస్తే ఇవి త‌క్కువ నిర్వ‌హాణ రుసుమును వ‌సూలు చేస్తాయి. ఇవి స్టాక్ ఎక్స్ఛేంజీల్లో ట్రేడ‌వుతుంటాయి. కాబ‌ట్టి వీటిని ఎక్స్ఛేంజ్ ట్రేడెడ్ ఫండ్లు అంటారు.

క్రియాశీల‌కంగా నిర్వ‌హించే ఈక్విటీ ఓపెన్ ఎండ్ ఫండ్లు వీటిలో రాబ‌డి ఎక్కువ వ‌చ్చేందుకు అవ‌కాశం ఉంటుంది. రిస్క్ కూడా ఎక్కువ ఉంటుంది. దీని నిర్వ‌హ‌ణ‌కు రుసుము కొంత ఎక్కువ‌గా ఉంటుంది. క్లోజ్డ్ ఎండెడ్ ఫండ్లు ఇవి నిర్ణీత కాలం వ‌ర‌కూ కొన‌సాగుతాయి. పెట్టుబ‌డి కొంత కాలం పాటు స్థిరంగా ఉంచాల‌నుకునే మ‌దుప‌ర్లు ఇవి ఎంచుకోవ‌చ్చు. ఈటీఎఫ్ ల్లో నిర్వ‌హ‌ణ రుసుము త‌క్కువగా ఉంటుంది. ఇవి సూచీల‌ను అనుక‌రిస్తూ పెట్టుబ‌డులు చేస్తుంటాయి. కాబ‌ట్టి సంబంధిత సూచీకి ద‌గ్గ‌ర‌గా రాబ‌డి అందుతుంది. వీటిలో న‌ష్ట‌భ‌యం ఎంపిక చేసుకునే ఇండెక్స్ ను బ‌ట్టి ఉంటుంది. నిఫ్టీ, సెన్సెక్స్ వంటి మొత్తం మార్కెట్ ను ప్ర‌తిబింబించే సూచీల్లో న‌ష్ట‌భ‌యం త‌క్కువ‌గా ఉంటుంది. సెక్టార్ సంబంధిత ఇండెక్స్ ఆధారిత ఈటీఎఫ్‌ల్లో న‌ష్ట‌భ‌యం ఎక్కువ‌గా ఉంటుంది.

Comments

0

Post Comment

Thank you for submitting your comment. We will review it, and make it public shortly