జీవిత బీమా హామీ మొత్తాన్ని క్లెయిమ్ చేసుకునే విధానం..

ఒకవేళ పాలసీదారుడు మరణించినట్లైతే, పాలసీకి సంబంధించిన హామీ మొత్తాన్ని బీమా సంస్థలు నామినీకి చెల్లించాల్సి ఉంటుంది

జీవిత బీమా హామీ మొత్తాన్ని క్లెయిమ్ చేసుకునే విధానం..

ప్రస్తుత రోజుల్లో జీవిత బీమా పాలసీని కొనుగోలు చేయడం చాలా సులభం. ప్రీమియంను చెల్లించి, బీమా దరఖాస్తు ఫారంకు కొన్ని పత్రాలను జత చేసి, ఆరోగ్య తనిఖీ పూర్తి చేయడం ద్వారా మీరు బీమాదారుడిగా మారవచ్చు. చాలా మంది ఆన్ లైన్ ద్వారా కేవలం కొన్ని నిమిషాల వ్యవధిలోనే బీమాను కొనుగోలు చేస్తున్నారు. అయితే, ఇక్కడ మీరు తెసులుసుకోవాల్సిన విషయం ఏమిటంటే, మీ మరణం తర్వాత మీ కుటుంబం క్లెయిమ్ మొత్తాన్ని ఎలా పొందుతారు? అలాగే క్లెయిమ్ మొత్తాన్ని స్వీకరించడానికి వారు తీసుకోవాల్సిన చర్యలు ఏమిటి? ఈ కథనం ద్వారా మీ జీవిత బీమా హామీ మొత్తాన్ని పొందేందుకు మీ కుటుంబ సభ్యులు ఎలాంటి చర్యలు తీసుకోవాలనే దానిపై మీకు మార్గనిర్దేశం చేస్తున్నాము.

జీవిత బీమా అంటే ఏమిటి?

జీవిత బీమా పాలసీ అనేది పాలసీదారుడికి, బీమా సంస్థకు మధ్య ఒక ఒప్పందం. ఒకవేళ పాలసీదారుడు మరణించినట్లైతే, పాలసీకి సంబంధించిన హామీ మొత్తాన్ని బీమా సంస్థలు నామినీకి చెల్లించాల్సి ఉంటుంది. ఇప్పుడు క్లెయిమ్ ను పరిష్కరించడానికి నామినీ ఏమి చేయాలో కింద చూద్దాం.

క్లెయిమ్ సెటిల్మెంట్ ఫారం :

ముందుగా మీరు బీమా సంస్థ నుంచి క్లెయిమ్ సెటిల్మెంట్ ఫారంను పొంది, దానిలో మీ వివరాలను పూరించాలి. ఫారంతో పాటు మీకు సంబంధించిన పత్రాలను జత చేయాల్సి ఉంటుంది. మీరు జత చేయాల్సిన పత్రాల జాబితాను కింద తెలియచేస్తున్నాము.

  • అసలు పాలసీ పత్రం

  • ఫారంలో, నామినీగా హక్కుదారుడి పేరు ఉందో లేదో పరిశీలించాలి. ఒకవేళ లేకపోతే, అప్పుడు హక్కుదారుడు వీలునామాను సమర్పించడం ద్వారా మరణించినవారికి చట్టపరమైన వారసుడు తనేనని నిరూపించాల్సి ఉంటుంది. ఒకవేళ వీలునామా లేనట్లయితే, వారసత్వ చట్టాల ద్వారా నిరూపించాల్సి ఉంటుంది.

  • ఒకవేళ హక్కుదారుడు నామినీ అయినట్లయితే, నామినీకి, మరణించిన వ్యక్తికి మధ్య గల సంబంధాన్ని ధృవీకరించే ఐడీ ప్రూఫ్ ను అందించాల్సి ఉంటుంది.

  • నోటరీ చేయించిన పాలసీదారుడి మరణ ధ్రువీకరణ పత్రం

  • ఒకవేళ ఆసుపత్రిలో మరణించినట్లైతే, ఆసుపత్రి జారీ చేసే మరణ ధ్రువీకరణ పత్రం

  • హక్కుదారుడి ప్రస్తుత చిరునామా రుజువు కాపీ

పైన పేర్కొన్న పత్రాలతో పాటుగా ఒకవేళ ప్రమాదవశాత్తూ మరణించినట్లైతే సమర్పించాల్సిన పత్రాలు :

  • హాస్పిటల్ సర్టిఫికేట్

  • పోస్ట్ మార్టం రిపోర్ట్

  • ఎఫ్ఐఆర్ కాపీ

  • పోలీసుల తుది నివేదిక

  • ఏదైనా వార్తాపత్రిక కటింగ్ (ఒకవేళ ఉంటే)

  • ఒకవేళ డ్రైవింగ్ చేస్తున్న సమయంలో ప్రమాదం కారణంగా మరణించినట్లైతే, అతని డ్రైవింగ్ లైసెన్స్ ను సమర్పించాలి.

  • ఒకవేళ పాలసీదారుడు ఇతర దేశాల్లో మరణించినట్లైతే, అక్కడ ఖననం చేసినట్లు ధ్రువీకరించే పత్రాలను సమర్పించాలి.

అన్ని డాక్యుమెంట్లను సమర్పించిన సమయంలో ఇచ్చే ఎక్నాలెడ్జ్మెంట్ స్లిప్ ను చాలా జాగ్రత్తగా ఉంచుకోండి. ఎందుకంటే ఒకవేళ క్లెయిమ్ విషయంలో ఏదైనా ఇబ్బంది తలెత్తినప్పుడు అది మీకు చాలా ఉపయోగకరంగా ఉంటుంది.

క్లెయిమ్ సెటిల్మెంట్ :

క్లెయిమ్ ను ఎలా దాఖలు చేయాలో పైన మీరు తెలుసుకున్నారు. ఇప్పుడు మీకు వచ్చే మరో సందేహం ఏమిటంటే, డబ్బు పొందడానికి ఎంత సమయం పడుతుంది? దీనికి సంధానం - ఐఆర్డీఏఐ రెగ్యులేషన్స్ 2002 లోని ఆర్టికల్ 8 ప్రకారం, సమర్పించాల్సిన అన్ని పత్రాలతో పాటు బీమా సంస్థ అడిగే అదనపు పత్రాలను సమర్పించిన 30 రోజుల్లోగా క్లెయిమ్ ను పరిష్కరించాల్సి ఉంటుంది. ఒకవేళ క్లెయిమ్ కు మరింత విచారణ అవసరమైతే, క్లెయిమ్ దాఖలు చేసిన రోజు నుంచి ఆరు నెలల లోపల క్లెయిమ్ ను పూర్తి చేయాల్సి ఉంటుంది.

హక్కుదారు, బీమా సంస్థ మధ్య వివాదం ఏర్పడినట్లైతే, ఎవరి వద్దకు వెళ్ళాలి ?

అనేక సందర్భాల్లో, సరైన పత్రాలను సమర్పించపోవడం వలన జీవిత బీమా క్లెయిమ్లు ఆలస్యం అవ్వడం లేదా తిరస్కరణకు గురవ్వడం జరుగుతాయి. కావున, ఏ కారణం చేత మీ క్లెయిమ్ తిరస్కరణకు గురైందో ముందుగా నిర్ధారించుకోండి. ఇలాంటి కేసులను పరిష్కరించడానికి ఐఆర్డీఏఐకు సంబంధించిన ఒక ప్రత్యేక న్యాయస్థానం (ఇన్సూరెన్సు ఆంబుడ్స్మెన్) ఉంది, ఇక్కడ అన్ని క్లెయిమ్లకు సంబంధించిన వివాదాలు పరిష్కారం అవుతాయి.

Comments

0

Post Comment

Thank you for submitting your comment. We will review it, and make it public shortly