ఎల్ఐసీ లేదా ఏదైనా బీమా పాలసీని ఎప్పుడు సరెండర్ చేయాలి?

మెచ్యూరిటీకి ముందే పాలసీని తిరిగి ఇచ్చేయడం ద్వారా పాలసీదారుడు పొందే నగదు విలువను సరెండర్ వ్యాల్యూ అంటారు

ఎల్ఐసీ లేదా ఏదైనా బీమా పాలసీని ఎప్పుడు సరెండర్ చేయాలి?

మూడు సంవత్సరాల క్రితం రమేష్ అనే వ్యక్తి ఎల్ఐసీ నుంచి సాంప్రదాయ ఎండోమెంట్ పాలసీని తీసుకున్నాడు. అతను ఇప్పటికే మూడు సంవత్సరాల ప్రీమియంను చెల్లించాడు. తదుపరి ప్రీమియం వచ్చే నెలలో చెల్లించాల్సి ఉంది. పెట్టుబడులకు ఎండోమెంట్ పాలసీలు అంత మంచివి కాదని రమేష్ కి వాళ్ళ స్నేహితులు చెప్పారు. ఈ పాలసీల్లో రాబడి కేవలం 4 నుంచి 5 శాతం మాత్రమే ఉంటుందని, కొన్ని సందర్భాల్లో రాబడి గరిష్టంగా 6 శాతం వరకు ఉంటుంది. ఈ రకమైన రాబడుల కారణంగా అతను తమ పాలసీని కొనసాగించడానికి ఇష్ట పడలేదు. అలాగే అతను ఇతర బీమా సంస్థల నుంచి కొనుగోలు చేసిన 2 ఇతర ఎండోమెంట్ పాలసీల పరిస్థితి కూడా ఇలానే ఉంది. వాటి కాలపరిమితి 15 సంవత్సరాలు, 20 సంవత్సరాలు. ఇప్పుడు అతను ఈ పాలసీలను కొనసాగించాలా లేదా సరెండర్ చేయాలా అని తెలుసుకోవాలనుకుంటున్నాడు.

మీరు కూడా రమేష్ లాగా ఇలాంటి పరిస్థితినే ఎదుర్కొంటున్నారా? బీమా పాలసీని సరెండర్ చేయడం వెనుక ఉన్న లాజిక్ ను మీరు కూడా తెలుసుకోవాలనుకుంటున్నారా? మొదటగా, సాంప్రదాయ ఎండోమెంట్ బీమా పాలసీల సరెండర్ విలువ గురించి తెలుసుకుందాం.

సరెండర్ విలువ అంటే ఏమిటి ?

మెచ్యూరిటీకి ముందే పాలసీని తిరిగి ఇచ్చేయడం ద్వారా పాలసీదారుడు పొందే నగదు విలువను సరెండర్ వ్యాల్యూ అంటారు. సాదారణముగా మొదటి ప్రీమియంను చెల్లించిన తర్వాత పాలసీని సరెండర్ చేసినట్లయితే, ఎలాంటి సరెండర్ వ్యాల్యూని పొందలేరు. మార్కెట్‌లోని చాలా పాలసీలు మూడవ ప్రీమియంను చెల్లించిన తర్వాత మాత్రమే సరెండర్ వ్యాల్యూను అందిస్తాయి. ఒకవేళ పాలసీ కాలపరిమితి తక్కువగా ఉంటే 2వ ప్రీమియం చెల్లించిన తర్వాత కూడా సరెండర్ విలువను అందించే కొన్ని పాలసీలు ఉన్నాయి. దీనిని గ్యారెంటీడ్ సరెండర్ వ్యాల్యూ అని కూడా అంటారు.

ప్రత్యేక సరెండర్ వ్యాల్యూ:

ప్రత్యేక సరెండర్ వ్యాల్యూ సాధారణంగా హామీ ఇచ్చిన సరెండర్ వ్యాల్యూ కంటే ఎక్కువగా ఉంటుంది, ఎందుకంటే బోనస్ మొత్తంలోని కొంత భాగాన్ని సరెండర్ వ్యాల్యూకు జత చేస్తారు.

రెండు లేదా మూడు సంవత్సరాల ప్రీమియం చెల్లించిన తర్వాత మాత్రమే సరెండర్ వ్యాల్యూ లేదా హామీ ఇచ్చిన సరెండర్ వ్యాల్యూను ఎక్కువగా పొందే అవకాశం ఉంటుందని బీమా సంస్థలు తెలియచేస్తున్నాయి. ఐఆర్డీఏఐ నిబంధనల ప్రకారం, రెండు లేదా మూడు సంవత్సరాల ప్రీమియంను చెల్లించిన తర్వాత పాలసీని సరెండర్ చేస్తే, చెల్లించిన మొత్తం ప్రీమియంలో కనీసం 30 శాతాన్ని పాలసీదారులకు తిరిగి చెల్లించాలి. అయితే, మొదటి సంవత్సరం చెల్లించిన ప్రీమియంను బీమా సంస్థలు లెక్కలోకి తీసుకోవు.

ఎల్‌ఐసీ పాలసీని సరెండర్ చేయొచ్చా?

పాలసీని సరెండర్ చేయడం అంత మంచి విషయమేమి కాదు. ఎందుకంటే ఈ ప్రక్రియలో మీరు ఖచ్చితంగా కొంత డబ్బును కోల్పోతారు. మీరు పాలసీ తీసుకున్న తేదీ నుంచి ఎంత త్వరగా పాలసీని సరెండర్ చేస్తారో అంత ఎక్కువ నష్టపోతారు. కానీ కొన్నిసార్లు నష్టాలను భరించడం అవసరం. ఇతర సాధనాల్లో పెట్టుబడులు పెట్టడం వలన మంచి రాబడులు వస్తాయంటే, ఈ నష్టాలను భరించడంలో అర్ధం ఉంది.

ఉదాహరణకు అజయ్‌ అనే వ్యక్తికి ఒక ఎండోమెంట్ పాలసీ ఉంది, దాని కోసం అతను సంవత్సరానికి రూ. లక్ష ప్రీమియం చెల్లిస్తాడు. పాలసీ కాలపరిమితి 10 సంవత్సరాలు, అంటే అజయ్ 10 సంవత్సరాల పాటు ప్రీమియం చెల్లించాల్సి ఉంటుంది. 10 సంవత్సరాల తరువాత మెచ్యూరిటీ విలువను అతను పొందుతాడు. అయితే, అతను మూడు సంవత్సరాల ప్రీమియం చెల్లించగా, ఇంకా ఏడు ప్రీమియంలను చెల్లించాల్సి ఉంది. అతను పాలసీని సరెండర్ చేయాలా లేదా పాలసీతో కొనసాగాలా?

ఒకవేళ అజయ్ పాలసీని సరెండర్ చేసినట్లయితే, అతను పొందే మొత్తం - రూ. 3,00,000 * 0.40 = రూ. 1.2 లక్షలు (సుమారు విలువ). ఇది కొన్ని సమయాల్లో మరింత తక్కువగా ఉండవచ్చు. (0.40 ను ప్రత్యేక సరెండర్ ఫ్యాక్టర్ గా పరిగణిస్తారు, ప్రీమియం చెల్లించిన మొత్తం - రూ. 3,00,000)

ఒకవేళ అజయ్ పాలసీని సరెండర్ చేస్తే రూ. 1.80 లక్షలు నష్టపోతాడు. అదే అజయ్ పాలసీతో కొనసాగాలని నిర్ణయించుకున్నట్లైతే, 6 శాతం కాంపౌండ్ యాన్యువల్ గ్రోత్ రేట్ (సీఏజీఆర్) వస్తుందని అనుకుంటే, మెచ్యూరిటీ సమయంలో మొత్తం రూ. 13.2 లక్షలు పొందుతాడు.

మ్యూచువల్ ఫండ్స్ లో మంచి రాబడి వస్తుందని అజయ్ కి వాళ్ళ స్నేహితులు చెప్పడంతో, అతను తన పాలసీని సరెండర్ చేశాడు. సరెండర్ చేయడం ద్వారా వచ్చిన మొత్తం రూ. 1.2 లక్షలును ఈక్విటీ మ్యూచువల్ ఫండ్లలో పెట్టుబడి పెట్టాడు. అలాగే, అతను ఎండోమెంట్ పాలసీలో చెల్లించని ఏడు ప్రీమియంలను ఈక్విటీ మ్యూచువల్ ఫండ్లలో పెట్టుబడి పెట్టాలని నిర్ణయించుకున్నాడు.

రూ. 13.2 లక్షలను పొందడానికి ఎంత రాబడి అవసరమో మీకు తెలుసా?

రాబోయే ఏడు సంవత్సరాలలో 13 శాతం సీఏజీఆర్ వస్తే తప్ప రూ. 13.2 లక్షల రాబడిని పొందలేరు. ఇది సాంప్రదాయ పాలసీ కంటే ప్రమాదకరమైన పెట్టుబడి. ఇంత తక్కువ వ్యవధిలో ఈ రాబడిని పొందడం చాలా కష్టం. కావున, పాలసీని సరెండర్ చేయకపోవడం మంచిది.

ఒకవేళ పాలసీ టర్మ్, ప్రీమియం చెల్లింపు టర్మ్ 15 సంవత్సరాలు ఉంటే?

పైన పేర్కొన్న అదే కేసులో పాలసీ కాలవ్యవధి 15 సంవత్సరాలు అనుకుంటే, అజయ్ రూ. 23.3 లక్షల మెచ్యూరిటీ విలువను 6 శాతం రాబడిని పొందుతారు.

ఒకవేళ అతను పాలసీని సరెండర్ చేసి రూ. 1.8 లక్షలు నష్టపోయి, వచ్చిన సరెండర్ వ్యాల్యూని, భవిష్యత్ ప్రీమియాన్ని మ్యూచువల్ ఫండ్లలో పెట్టుబడి పెట్టినట్లయితే, కనీసం 10 శాతం రాబడితో 12 సంవత్సరాల తరువాత అతను రూ. 25.2 లక్షలు పొందవచ్చు. పెట్టుబడి పెట్టడానికి ఎక్కువ సమయం ఉన్నందున కనీసం 10 శాతం రాబడిని సులభంగా పొందవచ్చు. దీంతో అతను తన నష్టాలను పూడ్చడంతో పాటు, అదనంగా రూ. 1.9 లక్షలు పొందవచ్చు. ఇలాంటి సందర్భంలో పాలసీని సరెండర్ చేయడం సరైన ఆలోచనే.

ముగింపు :

బీమా పాలసీని పెట్టుబడి సాధనంగా తీసుకోవడం ద్వారా ఇప్పటికే ఒక పొరపాటు జరిగింది. పాలసీని సరెండర్ చేయడం ద్వారా మీరు రెండవ తప్పు చేయలేదని నిర్ధారించుకోండి. డబ్బును పోగొట్టుకోవడం చాలా సులభం, కానీ దాన్ని తిరిగి పొందడం చాలా కష్టమైన పని. బీమా ఉత్పత్తులు చాలా క్లిష్టమైనవి, వాటిని అర్థం చేసుకోవడం కొంచం కష్టం. ఏదైనా ప్రోడక్ట్ ను తీసుకునే ముందు అది మీకు మంచిదా కాదా అని తెలుసుకోవడానికి కొంత సమయం కేటాయించండి. చివరగా, యాదృచ్ఛిక నిర్ణయానికి బదులుగా పూర్తి సమాచారం ఆధారంగా నిర్ణయం తీసుకోండి.

ఎల్‌ఐసీ పాలసీని ఆన్‌లైన్‌లో ఎలా సరెండర్ చేయాలి?

మీరు ఎల్‌ఐసీ పాలసీని ఆన్‌లైన్‌లో సరెండర్ చేయలేరు. దాని కోసం మీ దగ్గరలోని శాఖను సందర్శించడం లేదా సరెండర్ ఫారం, పాలసీ డాక్యుమెంట్ ను కొరియర్ ద్వారా సంబంధిత శాఖకు పంపడం. అలాగే పాలసీని కొనుగోలు చేసిన అదే శాఖలో పాలసీని సరెండర్ చేయాల్సి ఉంటుంది.

Comments

0

Post Comment

Thank you for submitting your comment. We will review it, and make it public shortly